Leo que o alcalde de Santiago,
o inimitable Gerardo Conde Roa, ten un problemiña con Facenda:
denúnciao por, supostamente, ter defraudado 300.000 euros. Como non
me cabe dúbida de que é tan inocente como a infanta Cristina non caso
Urdangarin, non vou pórme moralista e dicir que debería dimitir, pedir
perdón ou pór o seu talonario ao servizo dos parados de Compostela. Nada máis lonxe da miña intención! Só quero contarlles o que faría eu
se tivese a posibilidade de evadir 300.000 euros para fins benéficos. O
primeiro sería crear a Fundación López Silva para a Promoción e Mellora
do Concello Compostelán, e pediría o traslado dous plenos ao Salón
Teatro, alugado para tal fin. Ademais, contrataría a Leo Bassi a modo de
xefe de comunicación, e poríao ao servizo da corporación, para que os
asesorase en inauguracións, cafés con empresarios e entregas de premios. Os que quixesen clases extras co gran actor, deberían pagalas do seu
peto, pois os 300 dos grandes serían exclusivamente para promover o
ben común. E lles pagaría aos concelleiros por non gobernar, en prol da
tranquilidade da cidadanía compostelá. Para rematar, o proxecto estrela
sería lograr que Conde Roa comprenda que non só lle gusta o teatro,
senón que lle encanta. Aí estaría disposta a investir boa parte dos
300.000: que me dean unha amnistía fiscal que para Facenda sería ben
produtivo o proxecto de Reeducación da Alcaldía da miña Fundación.
Despreocuparíanse de vez.
No hay comentarios:
Publicar un comentario