La Voz de Galicia. 6 de xullo de 2014.
Debe de ser case paralizante levantarte pola mañá e
saber que coas túas decisións podes mellorar a vida da xente. Así
imaxino que debe encarar a vida o político, aínda que a realidade se
empeñe en demostrar que nese oficio hai moito indolente, unha manchea e den "trepas" e un número insoportable de lerchos. Pero penso agora no bo
gobernante e nas posibilidades infinitas que ten, na cantidade abafadora
de pistas que os cidadáns deixan cada día para indicarlle por onde ten
que transitar unha xestión cabal. Espero que algún deses políticos escoitara a Patricia Martínez. A moza concluíu a súa formación
preuniversitaria cuns resultados apabullantes que a semana pasada a
levaron a recibir o aplauso do país no que vive. Filla e valedora da
escola pública, alumna do instituto de Mondoñedo, o seu discurso conmove
por coherente e profundo e consegue que algo se tranquilice dentro de
cada un de nós; se estas son as persoas que veñen detrás, talvez as
cousas irán ben. Penso mentres escoito a Patricia nese político e na
responsabilidade que debería sentir ante ela. Na súa obrigación de non
defraudala; no seu deber de garantir que todas as Patricias de Galicia
van gozar coa sabedoría como o fai ela. E iso pasa por protexer e
consentir a educación pública, por respectar aos mestres e coidar aos
estudantes. A moza mindoniense foi premiada a mesma semana na que Baltar
era xulgado en Ourense. Un proceso no que quedou claro que o mérito e a
capacidade son cuchufletas para moitos deses políticos. Entre a Galicia
que representa Baltar e a que simboliza Patricia deberiamos ter claro
en cal queremos vivir.
Entrevista con Patricia Martínez (vídeo).
No hay comentarios:
Publicar un comentario