Un exame de selectividade para a clase política

Laureano López

06 de xullo de 2014  . La Voz de Galicia

As imputacións non nos deixan ver o bosque. Pero hai unha Galicia da que estar orgullosos. Vimos esta semana 434 exemplos perfectos: os sobresaíntes en selectividade. Mozos con estes soños: ser mellores persoas, ser grandes profesionais. ¿Que tivese sido de moitos deles sen a educación pública? Díxoo o martes a número un entre todos os números un: «Dou as grazas a ela. Hai moitos que non podemos permitirnos pagar polos nosos estudos». Foi un discurso de 10 dunha muller con expediente 10. Patricia Martínez falou da súa receita para o éxito: «Só esforzo e traballo». Esforzo e traballo. O oposto ao enchufismo. O oposto ao «tí vai facendo». O oposto ao «¡feito!». O discurso de Patricia debería repartirse en despachos, plenos e xulgados... para pór coloreados a quen utilizan a coartada dos defectos de forma. Existe outra Galicia, a Galicia para a que -o dixo Edison- o éxito é un 90 % de transpiración, de suor. A de obreiros, estudantes e empresarios cuxos logros veñen da suor das súas frontes. A Galicia que está máis preto de Picasso, o xenio formado nun instituto público galego, o xenio ao que a inspiración sempre sorprendeu traballando. Talvez o problema desta clase política é que non teñen selectividade, que non hai filtros, nin control de aforamento, nin se reserva o dereito de admisión. Deses pos chegan estes lodos. Pasen e vexan: a tendencia da tempada é a prevaricación e o suborno. Así pagan xustos por pecadores. Faise, pois, necesario un proceso selectivo, unha proba para suspender a aqueles que soñan cun escano... para medrar ou durmir a sesta. Fai falta unha clase política mellor, que se desviva para que cada un destes 434 alumnos de sobresaínte poidan cumprir o seu soño. Que non é, claro, recoller vasos e pasar o trapo ás mesas dun bar en, por exemplo, Bremen.

ADVERTISEMENT