Os docentes que participaron no concurso de traslados tomarán posesión dun posto de traballo que lles pode durar meses á espera dun proceso xudicial
Nunca un proceso tan común e ordinario como un
concurso de traslados autonómico entre profesores deu tanto que falar.
Comezou como un pequeno copo de neve, a bóla xa ten considerables
dimensións, e pode crecer aínda ata converterse nun alude que implica a
miles de profesionais da educación.
¿Cal é o desencadenamento da polémica?
O ano pasado a Xunta convocou un novo concurso
para os docentes das etapas non universitarias. Nel introduciuse un
cambio xustificado en base a unha directiva europea que reza que non
pode discriminarse a un traballador temporal respecto dun fixo. Por iso é
polo que por primeira vez, e converténdose Galicia na única comunidade
en facelo, os anos traballados antes de lograr a praza fixa comezaron a
puntuar no traslado, e en tres apartados diferentes. Esta disparidade de
criterio en se deben puntuar ou non nos traslados os anos previos a
converterse en funcionario de carreira non só ocorre na comunidade
galega, e de feito Estremadura, ante a dúbida, decidiu que non
convocaría concurso de traslados. Pola súa banda, o Ministerio de
Educación, que no 2015 vai realizar un concurso estatal, tampouco terá
en conta as interinidades.
¿A quen beneficiou o cambio de criterio?
Todo o colectivo de profesorado, afectado
positiva ou negativamente polo novo baremo, insiste en que non se trata
dunha batalla entre profesores nin de prexudicar a ninguén, senón contra
un cambio de criterio que consideran inxusto e precipitado. Pero
obxectivamente os prexudicados son aqueles profesores que lograron unha
praza fixa hai anos e fixérono directamente, sen ter pasado anos
realizando substitucións e con interinidades. Os máis beneficiados, polo
tanto, docentes con moitos anos de traballo acumulados, pero que
sacaron a praza recentemente.
¿Que medidas tomaron os docentes que se sentiron prexudicados?
A polémico non tardou. Centos de profesores con
anos de antigüidade como funcionarios de carreira vían como as súas
opcións se debilitaban. Presentaron queixas ao Valedor, no Rexistro da
Xunta e chegaron aos xulgados. E alertaron: paralizar o concurso de
traslados sería a mellor opción para todos, afectados e non afectados. É
dicir, todos nos seus postos actuais ata que os xuíces desen a última
palabra. Hai que recordar que o concurso de traslados realízase entre
profesores con praza fixa, é dicir, que ningún está en paro ou en
expectativa de lograr traballo.
¿Por que declarou ilegal o xuíz parte do concurso de traslados?
A Xunta decidiu seguir adiante con todo o proceso
a pesar dos recursos presentados. De feito o principal motivo que
alegou a Consellería de Educación para cambiar o baremo sempre foi a
inseguridade xurídica que provocaría non facelo. En abril fíxose oficial
a resolución cos novos destinos, pero a finais de xuño chegou a
noticia. Tres sentenzas dun xulgado compostelán declararon ilegal o
baremo, é dicir, a forma de puntuar. O xuíz alude a unha recente
sentenza do Supremo -do 9 de xuño- na que se asegura que as situacións
de interinidade e de funcionario de carreira non son comparables, polo
que existen razóns obxectivas para que só se puntúe a antigüidade como
funcionario con praza fixa. Conclusión, o xuíz obriga a rebaremar aos
docentes e a que non se lles teña en conta a antigüidade nos tres
apartados nos que se valoraba a interinidade.
¿A cantos profesores afecta a sentenza?
No concurso participaron uns 8.000. Só 1.673
decidiron finalmente cambiar de destino, e deles sostén a Xunta que un
20 %, é dicir, uns 350, veranse afectados polo rebaremo. ¿Pero que
ocorre se un profesor que decidiu non cambiar de posto, coas novas
condicións atopa un destino ao que antes non podía acceder? ¿E
viceversa? É dicir, que o número de afectados é difícil de cuantificar.
¿Aplica a Xunta o fallo xudicial en setembro?
Non. A Consellería de Educación podía recorrer o
fallo, pero decidiu non facelo, acatalo e rebaremar aos profesores de
cara ao 1 de setembro. Pero outros profesores afectados si recorreron, e
aínda que a Xunta solicitou unha execución provisional da sentenza,
chegou agosto, mes inhábil xudicialmente, e setembro achégase sen que
poida executarse o fallo ao non ser firme. Cabería a posibilidade de
paralizar o concurso e que cada profesor mantivese o seu posto actual
ata que o proceso xudicial finalice -o que parecería unha opción lóxica e
que desde un principio pediron os afectados-, pero a Administración
decidiu que mentres non hai sentenza firme, cada profesor tomará
posesión do destino que obtivo en abril, é dicir, co baremo que un xuíz
anulou.
¿Que pode ocorrer o próximo curso?
Se o Tribunal Superior de Xustiza de Galicia
acepta os recursos e declara válido o baremo, os docentes quedarán nos
postos que asuman o 1 de setembro. Se dá a razón ao xulgado compostelán
habería que rebaremar, os profesores afectados terían que dar marcha
atrás, volver aos seus destinos anteriores ou aos que lles outorgue o
rebaremo. É dicir, presúmese un proceso moi longo e complicado.
No hay comentarios:
Publicar un comentario