Máis recortes en educación

1. 
   

   Xosé Luís Sande Muñiz

   A Coruña

   Xoves 11 de agosto de 2011

   Polos datos que publica a Consellería de Educación, vemos como se produce outro recorte importante no número de profesores para o vindeiro curso escolar, recorte especialmente grave no caso dos que atenden a alumnado con minusvalías e Necesidades Educativas Especiais (profesorado de Pedagoxía Terapéutica e de Audición e Linguaxe).
   Coa escusa da crise, están a recortar sobre quen máis o necesita. Estes recortes son inxustificables e absolutamente inxustos, actuando con saña sobre a parte máis vulnerable da sociedade, as persoas con minusvalía. Estes recortes poden ter consecuencias para toda a vida desas persoas, condenadas moitas veces á exclusión social por non ter recibido a educación que se merecen, especialmente na infancia, época fundamental para a súa formación.
   Haberá que preguntarse que importancia lle estamos a dar á educación, canto nos preocupa a xustiza social para cubrir as necesidades de quen máis as necesita, canto de cinismo e hipocrisía hai neses políticos que recortan deste xeito cando non tiveron nin a decencia de renunciar ao plus de altos cargos que seguen a cobrar.