Conselleiro, ignorante ou mentiroso?

1. 
   

   Autor do comentario:

   Modesto Rodríguez Centrón

   Localidade:

   Ventosela (Ribadavia)

   Data de publicación:

   Xoves 01 de setembro de 2011.La Voz de Galicia.

   A 10 días do inicio do curso escolar, véñense de publicar os destinos dos mestres provisionais, suprimidos e interinos do Ensino Público. A cidadanía debe saber que moitos deles traballarán en especialidades para as que non están preparados pois non foron formados para o seu desempeño e carecen de tempo a tan poucas datas do inicio do curso. Pero para o Conselleiro de Educación a calidade educativa non é o máis importante nestes intres. E así o deixa patente ao obrigar ao Profesorado a pedir prazas por todas as Especialidades (a excepción do Inglés). Por poñer un exemplo gráfico, é como se a 10 días do comezo da Liga, decide o Presidente do Barcelona que Guardiola vai ser adestrador do equipo de Baloncesto, que o que leva a sección de atletismo tócalle a de Balonmán? e así sucesivamente. Alguén cun mínimo nivel de sentido común, pode crer que así se obterían mellores resultados? Cualificarían como bo xestor os socios do Barça ao Presidente? Onde están os sindicatos que obvian esta barbaridade nas súas reivindicacións de inicio de curso? Sr. Conselleiro, non nos fale de calidade da educación mentres siga permitindo este atropelo. Ou, como mestre que son, dubidarei se poñerlle no seu boletín cualificativo: IGNORANTE ou MENTIROSO.